អន្តរជាតិ៖ រដ្ឋមន្រ្តីការបរទេសចិន លោក វ៉ាង យី (Wang Yi) នឹងធ្វើដំណើរទស្សនកិច្ចទៅកាន់ប្រទេសអាល្លឺម៉ង់ ដើម្បីចូលរួមសន្និសីទស្ដីពីសន្តិសុខនៅទីក្រុង Munich មុននឹងបន្តដំណើរទស្សនកិច្ចទៅកាន់ប្រទេសអេស្ប៉ាញ និងប្រទេសបារាំងនាថ្ងៃបន្តបន្ទាប់។ នេះបើតាមការឱ្យដឹងពីក្រសួងការបរទេសចិន នៅថ្ងៃទី១៥ ខែកុម្ភៈនេះ។

នៅក្នុងសេចក្ដីថ្លែងការណ៍មួយ អ្នកនាំពាក្យក្រសួងការបរទេសបញ្ជាក់ថា៖ "ចាប់ពីថ្ងៃទី១៦ ដល់ថ្ងៃទី២១ ខែកុម្ភៈ រដ្ឋមន្រ្តីការបរទេស Wang Yi នឹងចូលរួមកិច្ចប្រជុំសន្តិសុខ លើកទី៦០ នៅទីក្រុង Munich ប្រទេសអាល្លឺម៉ង់ ដែលលោកនឹងថ្លែងសុន្ទរកថាមួយផងដែរនៅក្នុងកិច្ចប្រជុំនេះ"។ អ្នកនាំពាក្យបានបន្ថែមថា បន្ទាប់មកលោក Wang Yi នឹងទៅបំពេញទស្សនកិច្ចនៅប្រទេសអេស្ប៉ាញ និងបារាំង ដែលនៅទីនោះលោកនឹងរៀបចំកិច្ចសន្ទនាយុទ្ធសាស្ត្រចិន-បារាំង។

កិច្ចប្រជុំសន្តិសុខកំពូលប្រចាំឆ្នាំនៅទីក្រុង Munich នឹងប្រមូលផ្តុំដោយឥស្សរជនយោធាជាន់ខ្ពស់មកពីជុំវិញពិភពលោក ដែលនឹងចាប់ផ្តើមនៅថ្ងៃសុក្រនេះ។ ក្រសួងការបរទេសបញ្ជាក់ថា នៅក្នុងសុន្ទរកថាក្នុងកិច្ចប្រជុំនេះ លោក Wang នឹងរំលេចយ៉ាងលម្អិតអំពីសំណើរបស់ប្រទេសចិន លើការកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ ជាពិសេសលើប៉ូលនយោបាយ និងរបៀបរៀបរយរបស់ពិភពលោក។ 

រដ្ឋាភិបាលទីក្រុងប៉េកាំងបញ្ជាក់ថា ដំណើរទស្សនកិច្ចរបស់លោកទៅកាន់ប្រទេសអេស្ប៉ាញនឹងក្លាយជារដ្ឋមន្ត្រីការបរទេសចិនដំបូងបង្អស់ដែលធ្វើដំណើរទស្សនកិច្ចទៅកាន់ទីនោះក្នុងរយៈពេល ៦ឆ្នាំចុងក្រោយ។ ដំណើរទស្សនកិច្ចនេះនឹងពង្រឹងការជឿទុកចិត្តគ្នាទៅវិញទៅមក ដើម្បីបង្កើនមិត្តភាព លើកកម្ពស់កិច្ចសហប្រតិបត្តិការ និងពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងអេស្ប៉ាញ។

រដ្ឋាភិបាលចិនក៏រំពឹងទុកផងដែរថា ដំណើរទស្សនកិច្ចរបស់រដ្ឋមន្រ្តីការបរទេសចិនទៅកាន់ប្រទេសបារាំង នឹងធ្វើឱ្យទំនាក់ទំនងយុទ្ធសាស្ត្រកាន់តែស៊ីជម្រៅ ពង្រឹងទំនុកចិត្តគ្នាទៅវិញទៅមកផ្នែកនយោបាយ ជំរុញកិច្ចសហប្រតិបត្តិការជាក់ស្តែង ព្រមទាំងការផ្លាស់ប្តូរទំនាក់ទំនងរវាងប្រជាជន និងវប្បធម៌នៃប្រទេសទាំងពីរឱ្យកាន់តែល្អប្រសើរបន្ថែមទៀត៕